OKB: Përkeqësohet kriza humanitare në Jemen, shkak shkurtimet e fondeve

OKB-ja paralajmëroi këtë të hënë për një përkeqësim të situatës humanitare në Jemen për shkak të shkurtimeve të fondeve.

“Konteksti është shumë shqetësues. Ne presim që gjërat të jenë shumë më keq në vitin 2026”, tha Julien Harneys, i dërguari i Kombeve të Bashkuara për Jemenin.

Rreth 21 milionë njerëz do të kenë nevojë për ndihmë humanitare këtë vit, nga 19.5 milionë vitin e kaluar, sipas Kombeve të Bashkuara. Harneys tha se situata po përkeqësohet nga kolapsi ekonomik dhe ndërprerja e shërbimeve bazë si kujdesi shëndetësor dhe arsimi, si dhe pasiguria politike.

Ai tha se financimi që Jemeni  merrte nga vendet perëndimore tani po shkurtohet. SHBA-të kanë shkurtuar shpenzimet për ndihma këtë vit dhe donatorët kryesorë perëndimorë gjithashtu kanë shkurtuar ndihmën.

Ata kanë preferuar të rrisin shpenzimet e mbrojtjes, duke shkaktuar një krizë financimi për Kombet e Bashkuara. Jemeni ka qenë në qendër të një prej operacioneve më të mëdha humanitare në botë në një dekadë lufte civile që ka shkaktuar mungesa të mëdha ushqimore.

“Fëmijët po vdesin dhe do të përkeqësohet”, tha Harneys.

Ai tha se pasiguria ushqimore parashikohet të përkeqësohet në të gjithë vendin dhe priten nivele më të larta të kequshqyerjes. Harneys tha se kriza humanitare në Jemen kërcënon rajonin me sëmundje si fruthi dhe poliomeliti që mund të kalojnë kufijtë.