Nis me tensione sesioni i ri parlamentar, deputetët e PD bllokojnë foltoren

Ka nisur me debate nga opozita seanca e parë e sesionit të ri parlamentar për vitin 2026. Deputetët e opozitës janë ngritur nga karriget dhe janë afruar pranë foltores në momentin që kryetari Niko Peleshi ka nisur fjalën përshëndetëse.

Kreu i grupit parlamentar të PD, Gazment Bardhi dhe deputetë e tjerë të PD kanë kërkuar largimin nga salla të zv.kryeministres Belinda Balluku.

Kryetari i PD Sali Berisha është lidhur live me Facebookun e tij dhe ka mbajtur një fjalë në të njëjtën kohë që Peleshi mbante fjalën hyrëse të seancës.

Ndërsa kreu i grupit parlamentar të PS, Taulant Balla i dha ultimatum opozitës për reformën zgjedhore dhe territoriale.

Balla deklaroi se nëse deri javën tjetër, deputetët e opozitës nuk do të paraqiten në komision, ndryshimet do bëhen vetëm nga deputetët e mazhorancës.

Në një fjalë të mbajtur jashtë Kuvendit kreu i Grupit Parlamentar i Partisë Demokratike, Gazment Bardhi i bëri thirrje që kryetari i Kuvendit, Niko Peleshi të thërrasë sa më parë Këshillin e Rregullores dhe Mandateve lidhur me çështjen e Belinda Ballukut.