Teherani: Përcaktimi i Gardës Revolucionare nga BE si organizatë terroriste, vendim armiqësor

Shtabi i Përgjithshëm i Forcave të Armatosura të Iranit dënoi vendimin e Bashkimit Evropian për të etiketuar Trupat e Gardës Revolucionare Islamike, IRGC, njësi elitare të Forcave të Armatosura të Iranit, si një organizatë terroriste.

Më herët sot, Këshilli i Ministrave të Jashtëm arriti një marrëveshje politike për të shtuar IRGC të Iranit në listën e organizatave terroriste të Bashkimit Evropian, duke shënuar një ndryshim të fortë, megjithëse simbolik, në qasjen e Evropës ndaj udhëheqjes iraniane.

“Veprimet irracionale, të papërgjegjshme dhe të mbushura me urrejtje nga Bashkimi Evropian padyshim pasqyrojnë thellësinë e armiqësisë dhe urrejtjes së udhëheqësve të këtyre vendeve ndaj kombit të denjë të Iranit, forcave të tij të armatosura dhe sigurisë e pavarësisë së vendit”, thuhet në një fragment të deklaratës, siç citohet nga agjencia IRNA.

Shtabi i Përgjithshëm i Forcave të Armatosura Iraniane paralajmëroi gjithashtu se politikanët evropianë do të mbahen përgjegjës për këtë “vendim armiqësor dhe provokues”.

Më parë, kryediplomatja e Bashkimit Evropian, Kaja Kallas, tha, pas një takimi të Ministrave të Jashtëm të BE-së, se Trupa e Gardës Revolucionare Islamike (IRGC) ishte përcaktuar si organizatë terroriste në listën e organizatave terroriste të Bashkimit Evropian.