Trump tha se kërkon një marrëveshje me Iranin, bie nafta! Si ndikoi dialogu Trump-Khamenei në çmimin e ‘arit të zi’?

Çmimet e naftës ranë me më shumë se 3% në tregtimin e hershëm aziatik, pasi Presidenti i SHBA-së, Donald Trump, deklaroi se ishte i hapur për një marrëveshje me Iranin, pavarësisht kërcënimeve të vazhdueshme të këtij të fundit për veprime ushtarake.

Sipas mediave të huaja, nafta e papërpunuar amerikane West Texas Intermediate (WTI) ra me 3.4%, në 62.99 dollarë për fuçi, ndërsa nafta e papërpunuar Brent u ul me 3.2%, në 67.09 dollarë për fuçi, pas komenteve të presidentit amerikan.

Të dielën, Presidenti Trump tha se shpresonte të arrinte një marrëveshje me Iranin, vetëm disa orë pasi Udhëheqësi Suprem i Iranit, Ajatollah Ali Khamenei, paralajmëroi se çdo sulm i SHBA-së ndaj Republikës Islamike do të shkaktonte një luftë rajonale.

“Shpresoj se mund të bëjmë një marrëveshje. Nëse nuk e bëjmë, do të shohim nëse (Khamenei) ka të drejtë apo jo. Ne kemi anijet më të mëdha dhe më të fuqishme në botë atje,” tha Trump, në përgjigje të komenteve të Khameneit.