Coronavirus, shtohet frikshëm numri i të vdekurve në Itali, 27 vdekje brenda 24 orësh

Spanja ka konfirmuar vdekjen e parë nga coronavirusi COVID-19 këtë të martë, ndërsa numri i të vdekurve në Itali ka kërcyer në 79, duke u shtuar me 27 brenda 24 orëve.

Viktima në Spanjë rezultoi vetëm pas autopsisë që kishte pasur coronavirus COVID-19.

Ministri i shëndetësisë, Salvador lla, tha se nuk ishin në atë fazë që të kërkonin mbylljen e shkollave.

Ai theksoi që bëhej fjalë për një kalim sporadik të sëmundjes në zona shumë specifike të vendit.

Ndërkohë, turizmi ka pësuar humbje në Itali, me gati 90% të prenotimeve të anuluara. Kanalet e Venecias janë parë të boshatisura.

Përmbledhje e situatës me coronavirusin

 ➤ OBSH tha të martën se janë verifikuar 90.893 raste personash të infektuar në të gjithë botën, dhe janë  regjistruar 3110 të vdekr.

➤ Kina raportoi 129 raste të reja, numri më i ulët që nga 20 janari.

➤ 80% e rasteve në vende të tjera, jashtë Kinës, vijnë nga tri vende: Kore e Jugut, Itali dhe Iran

➤ Italia është vendi më i prekur në Europë, me 79 të vdekur. Franca ka 4 t vdekur

➤ Zvicra ka vënë ushtrinë në karantinë pasi një ushtar rezultoi me coronavirus

➤ OBSH thotë se keqpërdorimi i lajmeve po shkakton mungesë ilaçesh

➤ SHBA uli interesat për të ndihmuar ekonominë që pësoi rënie për shkak të virusit

➤ Organizata për Zhvillim dhe Bashkëpunim Ekonomik paralajmëroi se Europa mund të rikthehet në recesion

Nëpër Europë janë dhënë paralajmërime se virusi mund të përhapet edhe më shumë në ditët në vazhdim, në Britani e vende të tjera.

Komisionerja e BE-së për shëndetin, Stela Kiriakidu, tha se Qendra Europiane për Parandalimin dhe Kontrollin e sëmundjeve e kishte rritur nivelin e rrezikut, teksa blloku përpiqet të bashkërendojë përpjekjet për të penguar përhapjen.

Zyrtarët në Itali, ku numri i vdekjeve dhe i të prekurve vazhdon të jetë i lartë, thonë se duhen ende ditë për të kuptuar nëse kanë funksionuar masat e karantinës në qytezat e veriut.

Franca, e cila ka numrin më të madh të rasteve në Europë pas Italisë, u bëri thirrje banorëve që të mos i japin dorën personave që të takojnë dhe të mos shkojnë në evenimente me grumbullime të mëdha njerëzish.