Tensionet në Lindjen e Mesme: Autoritetet iraniane arrestojnë 139 shtetas të huaj gjatë protestave

Autoritetet në Iran kanë arrestuar 139 shtetas të huaj gjatë protestave që filluan në fund të dhjetorit, sipas nraportimit të mediave iraniane.

“Gjatë shqyrtimit të rasteve që lidhen me trazirat, u zbulua se 139 personat e arrestuar janë të huaj”, raportoi agjencia iraniane e lajmeve Tasnim, duke cituar shefin e policisë së qytetit qendror të Yazdit, Ahmad Negahban.

Sipas tij, ata ishin të përfshirë në “organizimin, nxitjen dhe kryerjen e trazirave, në disa raste në kontakt me rrjetet jashtë vendit”.

Protestat në Iran, të cilat fillimisht shpërthyen më 28 dhjetor në shenjë proteste kundër kostos së lartë të jetesës, më pas u zhvilluan në një lëvizje antiqeveritare, shtypja e së cilës ka lënë mijëra të vdekur, sipas organizatave joqeveritare.

Autoritetet iraniane pranojnë se më shumë se 3,000 njerëz janë vrarë në protesta, por thonë se shumica e viktimave ishin anëtarë të forcave të sigurisë ose kalimtarë të vrarë nga “terroristë” që vepronin në emër të SHBA-së dhe Izraelit.

Presidenca iraniane të dielën publikoi emrat e 2,986 personave të vrarë në trazira, nga një listë prej 3,117 të vdekurish.

Organizata joqeveritare me seli në SHBA, Agjencia e Lajmeve të Aktivistëve të të Drejtave të Njeriut (HRANA), ka konfirmuar vdekjen e 6,854 personave, shumica prej të cilëve protestues, ndërsa organizata të tjera të të drejtave të njeriut e japin numrin e viktimave shumë më të lartë.