Çfarë dimë për masakrën me 10 të vrarë në Kanada

Kanadaja është në gjendje shoku pas incidentit vdekjeprurës me të shtëna në një shkollë dhe një shtëpi fqinje në qytetin Tumbler Ridge, British Columbia. 

Dhjetë persona (përfshirë personin që kreu sulmin) humbën jetën mesditën w së martës (me orën lokale), në një nga episodet më të përgjakshme në historinë moderne të vendit, ndërsa autoritetet deri më tani që kanë qenë jashtëzakonisht të kujdesshme në dhënien e informacionit.

Komuniteti i vogël prej rreth 2,500 banorësh, ku pothuajse të gjithë njihen me njëri-tjetrin, mbetet i tronditur, ndërsa motivet dhe rrethanat e sakta të tragjedisë janë ende duke u hetuar.

Kronika e tragjedisë

Gjashtë nga viktimat u gjetën të vdekur në shkollën e mesme Tumbler Ridge , rreth 1,150 kilometra në verilindje të Vankuverit, sipas raportimeve. Një person tjetër ndërroi jetë nga plagët e marra gjatë rrugës për në spital.

Dy persona të tjerë u gjetën të vdekur në një banesë aty pranë, ndërsa policia i lidh drejtpërdrejt dy incidentet, duke vlerësuar se i njëjti autor e kreu vrasjen fillimisht në shtëpi dhe më pas u nis drejt shkollës.

I dyshuari u gjet gjithashtu i vdekur brenda ndërtesës së shkollës, pasi vrau veten. Autoritetet kanë deklaruar se e dinë identitetin e tij, por nuk po e publikojnë atë.

Më herët, një alarm emergjence 112 u dërgua në telefonat celularë të banorëve të zonës, në të cilin e dyshuara përshkruhej si një “grua me fustan dhe me flokë ngjyrë kafe”, një element që shton pyetje të mëtejshme në lidhje me identitetin dhe profilin e autorit të krimit.

Të paktën dy persona të tjerë u dërguan në spital me lëndime kërcënuese për jetën, ndërsa 25 persona vlerësohet se janë jashtë rrezikut për jetën. Orari i ndalim-qarkullimit i vendosur në shkollën e mesme dhe shkollën fillore aty pranë është hequr, por të dy institucionet arsimore do të mbeten të mbyllura deri në fund të javës.

Pyetje pa përgjigje

Detajet thelbësore të tragjedisë mbeten të panjohura. Policia lokale nuk ka njoftuar emrin ose gjininë e personit që besohet të jetë përgjegjës për sulmin vdekjeprurës, pavarësisht raportimeve se ky informacion është i njohur për autoritetet.

Identitetet dhe moshat e viktimave mbeten gjithashtu të panjohura për publikun, ndërsa autoritetet theksojnë se kërkohet konfirmim i plotë i të gjitha informacioneve përpara se ato të bëhen publike, duke përmendur respektin për familjet e viktimave.

Është gjithashtu e paqartë nëse numri i viktimave mund të rritet. Autoritetet kanë deklaruar se po vazhdojnë kërkimet në shtëpitë fqinje, pa specifikuar nëse këto janë përfunduar.

Misteri i motiveve

Sa i përket motiveve, nuk është dhënë asnjë shpjegim zyrtar. Përveç informacioneve të pakonfirmuara që flasin për një person me probleme psikologjike, autoritetet po shmangin çdo referencë për shkaqet e mundshme të sulmit.

Së fundmi, marrëdhënia e personit që kreu sulmin me shkollën mbetet e paqartë – nëse ai ishte apo kishte qenë nxënës, apo ishte i lidhur ndryshe me komunitetin arsimor.

Ndërsa hetimet janë në kulmin e tyre, komuniteti global po i ndjek me ankth zhvillimet, ndërsa komuniteti i vogël i Tumbler Ridge përpiqet të përballet me një goditje që do të lërë një gjurmë të thellë në kujtesën e tij kolektive.