NATO fillon misionin “Arctic Sentry”, për të forcuar praninë e saj në Arktik

NATO njoftoi sot se ka nisur një mision që synon forcimin e pranisë së saj në Arktik. Misioni është pjesë e një marrëveshjeje për të lehtësuar tensionet serioze brenda Aleancës, pasi Presidenti i SHBA-së Donald Trump shprehu dëshirën e tij që SHBA-të të përvetësojnë Groenlandën.

Misioni i ri, i quajtur “Arctic Sentry “, do të koordinojë praninë ushtarake në rritje të aleatëve të NATO-s në rajon, duke përfshirë edhe ushtrime të tilla si ” Arctic Endurance ” e Danimarkës në Groenlandë, njoftoi selia qendrore.

“Arctic Sentry nënvizon angazhimin e Aleancës për të mbrojtur anëtarët e saj dhe për të ruajtur stabilitetin në një nga rajonet më të rëndësishme strategjike dhe më sfiduese për mjedisin në botë”, tha Gjenerali i Forcave Ajrore të SHBA-së Alexus G. Grinkewitz, komandanti suprem i NATO-s në Evropë.

“Do të shfrytëzojë forcën e NATO-s për të mbrojtur territorin tonë dhe për të siguruar që Arktiku dhe Veriu të mbeten të sigurta”, shtoi ai.

NATO filloi planifikimin e misionit pas bisedimeve të muajit të kaluar në Davos midis Donald Trump dhe Sekretarit të Përgjithshëm të NATO-s Mark Rutte, në kulmin e krizës mbi Groenlandën, e cila është pjesë e aleatit Danimarkë.

Rutte dhe Trump ranë dakord që NATO do të luajë një rol më të madh në mbrojtjen e Arktikut, ndërsa Danimarka, SHBA-të dhe Groenlanda do të vazhdojnë diskutimet mbi të ardhmen e ishullit.

Qeveria britanike njoftoi gjithashtu se Forca e Përbashkët Ekspedituese (JEF) e udhëhequr nga Britania po planifikon aktivitete të rëndësishme ushtarake në Veri, me vendosjen e qindra personelit në Islandë, Ngushticën e Danimarkës dhe Norvegji, si pjesë e një stërvitjeje të planifikuar për në shtator.

JEF përbëhet nga Danimarka, Estonia, Finlanda, Islanda, Letonia, Lituania, Holanda, Norvegjia, Suedia dhe Mbretëria e Bashkuar.