Garuesi ukrainas skualifikohet nga Lojërat Olimpike Dimërore, mbante helmetë me imazhe të atletëve të vrarë

Piloti ukrainas i skeletonit, Vladyslav Heraskevych, është ndaluar të garojë në Lojërat Olimpike Dimërore pasi refuzoi të heqë helmetën që përmban imazhe të atletëve të vrarë gjatë pushtimit rus të Ukrainës.

26-vjeçari kishte mbajtur helmetën gjatë të gjitha stërvitjeve para nisjes së garës të enjten. Të martën, Komiteti Olimpik Ndërkombëtar (IOC) e njoftoi se ajo “nuk është në përputhje” me Kartën Olimpike dhe se nuk do të lejohej ta përdorte gjatë garës.

Megjithatë, të mërkurën Heraskevych u paraqit sërish me helmetën në stërvitjen zyrtare, duke deklaruar për BBC Sport se beson se “ka të gjitha të drejtat” për ta mbajtur atë.

Presidentja e IOC-së, Kirsty Coventry, e vizitoi sportistin në pistën rrëshqitëse të Cortinës përpara garës së parë kualifikuese. Sipas IOC-së, Heraskevych “nuk mori në konsideratë asnjë formë kompromisi”.

Në një deklaratë, IOC theksoi se ishte e interesuar që sportisti të garonte dhe se kishte zhvilluar bisedime me të për të gjetur një mënyrë “më të respektueshme” për të përmbushur dëshirën e tij për të kujtuar atletët e rënë. Organizata kishte propozuar që ai të mbante një shirit të zi në krah gjatë garës dhe të shfaqte helmetën në zonat e përziera, konferencat për shtyp apo në rrjetet sociale, duke theksuar se “fusha e lojës është e shenjtë”.

IOC iu referua edhe Rregullit 50.2 të Kartës Olimpike, i cili ndalon “çdo lloj demonstrimi ose propagande politike, fetare ose racore” në ambientet olimpike.

Nga ana tjetër, Heraskevych argumenton se homazhi i tij nuk ndryshon nga gjestet e sportistëve të tjerë, duke përmendur rastin e patinatorit artistik Maxim Naumov, i cili mbajti një foto të prindërve të tij – viktima të një aksidenti ajror në Uashington DC – ndërsa priste shpalljen e rezultatit.