Kriza ekonomike në Kubë, dy anije të Marinës meksikane dërgojnë 814 ton ndihma humanitare

Dy anije të Marinës Meksikane, të ngarkuara me ndihma humanitare, mbërritën këtë të enjte në Kubë, e cila po kalon një krizë shumë të rëndë ekonomike. Dy anijet që transportonin më shumë se 800 ton ndihma humanitare në emër të presidentes meksikane Claudia Sheinbaum, hynë në gjirin e portit të Havanës herët në mëngjes.

Meksika po përpiqet gjithashtu të negociojë një dërgesë të mundshme nafte në Kubë, pa u përballur me sanksione nga Shtetet e Bashkuara, të cilat po kërcënojnë të vendosin tarifa për çdo vend që furnizon Havanën me karburant.

Sipas qeverisë meksikane, dy ngarkesat që mbërritën sot, me një total prej 814 tonësh, përfshijnë kryesisht qumësht pluhur, produkte mishi, biskota, karrota, oriz dhe artikuj higjiene personale.

Havana akuzon Presidentin e SHBA-së Donald Trump se dëshiron të “mbytë” ekonominë e ishullit, ku që nga e hëna janë marrë masa të jashtëzakonshme shtrënguese: benzina shpërndahet me racion, shërbimet qeveritare funksionojnë vetëm katër ditë në javë. Gjithashtu është imponuar puna në distancë dhe mësimet universitare po zhvillohen nga distanca.