Ministri Tajani: Italia është gati të trajnojë policinë në Gaza

Italia ka shprehur gatishmërinë e saj që të ndihmojë në trajnimin e forcave policore në Gaza dhe në territoret palestineze. Kështu ka deklaruar këtë hënë ministri i jashtëm italian, Antonio Tajani në një konferencë për shtyp në Romë.

Kjo deklaratë vjen ndërsa Roma synon të luajë një rol në stabilizimin e Lindjes së Mesme.

“Jemi gati të trajnojmë një forcë të re policore në Gaza dhe jemi gjithashtu gati të trajnojmë një forcë policore palestineze”, tha Ministri i Jashtëm.

Ai gjithashtu konfirmoi se Roma është gati të merrte pjesë si vëzhguese në iniciativën e Bordit të Paqes të Presidentit të SHBA-së, Donald Trump. Tajani shtoi se Italia është ftuar të marrë pjesë në një takim të grupit këtë javë në Uashington.