Stili i veshjes së Zonjës së Parë të SHBA

Zonja e Parë, Melania Trump, foli këtë mëngjes në Muzeun Kombëtar Smithsonian të Historisë Amerikane në Uashington, DC, me rastin e shtimit të fustanit të saj të inaugurimit të vitit 2025 në koleksionin e muzeut dhe ekspozimit të tij në Galerinë e Zonjave të Para. (Po, bëhet fjalë për fustanin që ndoshta ju vjen menjëherë në mendje, sidomos nëse keni parë dokumentarin e saj Melania: atë të bardhë me vijën e zezë të valëzuar.)

Në fjalën e saj, Trump u ndal te fustani dhe te krijuesi i tij stilisti i saj prej vitesh, francezo-amerikani Hervé Pierre si edhe te përkushtimi dhe pasioni i saj për modën. Në fund të fundit, një nga tiparet më të qëndrueshme të imazhit të saj si Zonjë e Parë ka qenë paraqitja e kuruar me kujdes dhe magjepsja e saj personale ndaj stilit: taka të larta, kostume të strukturuara me funde, prirje për ngjyrën e zezë dhe një dashuri e dukshme për shtëpitë evropiane të modës. Sipas sekretarit aktual të Smithsonian, Lonnie G. Bunch III, i cili foli para saj, Trump është Zonja e Parë e parë në më shumë se 100 vjet që përfaqësohet në koleksion me dy fustane inaugurimi. “Kjo është vërtet e rëndësishme për ne”, u shpreh Bunch.

“Natyra njerëzore qëndron në disiplinën e detajeve. Gjithçka është te detajet”, tha Trump gjatë fjalimit. “Kjo është dëshmi e faktit pse industria amerikane e modës mund të udhëheqë botën.” Megjithatë, ndërsa theksonte “udhëheqjen e modës” amerikane për të përdorur fjalët e saj – ajo kishte veshur jo një, por dy marka evropiane, siç konfirmoi zyra e saj. Një detaj që vështirë se kalon pa u vënë re.

Kjo zgjedhje përcolli një mesazh: ose Trump nuk e konsideroi të rëndësishëm faktin që kishte veshur një pallto Bottega Veneta (italiane, me çmim rreth 4,300 dollarë online) të kombinuar me çizme lëkure gjarpri Christian Louboutin (franceze), ndërsa fliste për lidershipin amerikan në modë, ose thjesht nuk i kushtoi vëmendje këtij kontrasti. Megjithatë, duke pasur parasysh sa i menduar dhe i kuruar është zakonisht stili i saj, është e arsyeshme të supozohet se Zonja e Parë e di gjithmonë saktësisht çfarë vesh dhe nga vjen ajo.

Do të kishte qenë më koherente që, në një rast të tillë, ajo të zgjidhte një markë amerikane, duke e shprehur mbështetjen jo vetëm me fjalë, por edhe me veprime. Nuk është sekret që industria amerikane e modës, veçanërisht në Nju Jork, nuk e ka pritur ngrohtësisht Trump. Prandaj, nuk është për t’u habitur që ajo nuk veshi një markë amerikane këtë mëngjes dhe në fakt rrallëherë e bën. Në premierën e dokumentarit Melania ajo zgjodhi Dolce & Gabbana, ndërsa një ditë më parë, për të rënë zilën në Bursën e Nju Jorkut, kishte veshur Dior dhe Alaïa.

Ralph Lauren e veshi Zonjën e Parë për inaugurimin e parë të Donald Trump në vitin 2017 (ndërsa për mbrëmjen ajo zgjodhi një tjetër fustan nga Pierre), por që atëherë nuk ka pasur bashkëpunime të tjera. Pas zgjedhjes së parë të bashkëshortit të saj, shumë stilistë u zotuan publikisht se nuk do ta vishnin. “Nuk kam asnjë interes të vesh Melania Trump”, deklaroi Marc Jacobs për WWD në nëntor 2016. “Personalisht, preferoj ta përqendroj energjinë time në ndihmën e atyre që mund të dëmtohen nga [Donald] Trump dhe mbështetësit e tij.” Një përjashtim i dukshëm ka qenë stilisti me bazë në Nju Jork, Adam Lippes, i cili e veshi Melanian për inaugurimin e dytë në vitin 2025 dhe ka vazhduar ta stilojë atë edhe më pas. Lippes u shfaq gjithashtu në dokumentar, duke punuar përkrah Zonjës së Parë në përgatitjen e disa veshjeve./VanityFair