Pamje/ Nga Wall Street në front, ukrainasja braktis karrierën për t’u bërë mjeke lufte

Viktoriia Honcharuk, një mjeke që kishte një karrierë premtuese në Wall Street, vendosi të braktisë jetën e saj në SHBA për t’u bashkuar me vijën e frontit në Ukrainë pas pushtimit rus në shkurt 2022. Ajo tha për Sky News se ky ishte “vendimi më i lehtë që kam marrë ndonjëherë”.

Viktoriia tregoi se po “jetonte ëndrrën amerikane” me një karrierë të re në bankën e investimeve, por kur Rusia nisi sulmin e saj të plotë ndaj Ukrainës, ajo u frymëzua nga rezistenca e familjes dhe bashkatdhetarëve të saj. “Mamaja ime, babai im, motra ime… të gjithë iu bashkuan rezistencës sa më shpejt që mundën. Ata thanë: shikoni, ne nuk do të shkojmë askund… do të luftojmë për shtëpinë tonë, qytetin tonë. Kjo ishte shumë e admirueshme dhe më frymëzoi shumë,” tha ajo.

Pas disa muajsh duke ndihmuar nga larg, Viktoriia vendosi se nuk mund të qëndronte duarkryq dhe u kontaktua me motrën e saj për të marrë informacion mbi mënyrën për t’u angazhuar. Ajo kishte frikë nga gjaku dhe gjilpërat, por vendimi për t’u kthyer në Ukrainë dhe për të shërbyer në vijën e frontit si mjeke ishte i qartë. “Shumë njerëz mendojnë se ishte një vendim i vështirë të linin një karrierë të mirë dhe të ktheheshin në front, por për mua, duke parë prapa, ky ishte vendimi më i lehtë që kam marrë ndonjëherë,” shtoi ajo.

Pas disa ditësh stërvitjeje, Viktoriia u vendos në vijën e frontit, ku trajton jo vetëm civilë dhe ushtarë ukrainas, por edhe të burgosur lufte rusë, duke ndjekur rregullat e Konventës së Gjenevës. Ajo tha: “Është diçka që duhet ta bëjmë. Nuk kam të drejtë të zgjedh me kë duhet të punoj. Duhet t’i trajtojmë të burgosurit e luftës, rusët. Ke mundësi të flasësh me ta dhe të kuptosh se Rusia nuk do të ndalet me atë që po bën tani.”

Viktoriia beson se veprimet e ukrainasve të zakonshëm, si ajo dhe familja e saj, kanë penguar avancimin rus. “Nëse të gjithë do të thoshim ‘kjo nuk është lufta ime’, Rusia do të ishte duke përparuar më tej. Por vetëm për shkak të rezistencës së popullit, burrat dhe gratë në Ukrainë kanë vendosur t’i kundërvihen agresorit dhe të mbrojnë vendin e tyre,” tha ajo.

Përveç veprimit të saj në vijën e frontit, Viktoriia ka tërhequr vëmendjen edhe në fushën kulturore, duke u pikturuar nga artisti britanik Max Denison-Pender, duke treguar historinë e angazhimit të individëve në mbrojtje të atdheut./ Sky News