Modi në Izrael për vizitë dyditore, zbardhet axhenda për takimin me Netanyahu

Kryeministri indian Narendra Modi ka mbërritur në Izraeli për një vizitë dyditore, e para e tij që nga fillimi i luftës në Gaza.

Modi pritet të mbajë një fjalim në Knesset dhe të zhvillojë takime me kryeministrin Benjamin Netanyahu dhe presidentin Isaac Herzog. Në axhendën e tij nuk është parashikuar takim me udhëheqës palestinezë.

Vizita zhvillohet në një kohë kur India dhe Izraeli synojnë të forcojnë bashkëpunimin në mbrojtje, teknologji dhe tregti — një marrëdhënie që është thelluar ndjeshëm që kur Modi mori detyrën më shumë se një dekadë më parë.

Megjithatë, analistët vlerësojnë se kjo vizitë do të vërë në provë politikën e jashtme të Indisë, e cila përpiqet të ruajë ekuilibrin mes lidhjeve me Izraelin dhe vendeve të tjera të Lindjes së Mesme.

Në vitin 2017, Modi u bë kryeministri i parë indian që vizitoi Izraelin, një udhëtim që u konsiderua si pikë kthese në marrëdhëniet dypalëshe.

Të dy vendet bashkëpunojnë ngushtë në luftën kundër terrorizmit dhe në fushën e mbrojtjes, ndërsa India mbetet një nga blerësit më të mëdhenj të armëve izraelite.

Netanyahu e cilësoi vizitën e Modit si “historike”, duke shkruar në rrjetin social X se lidhja mes dy vendeve përfaqëson një aleancë të fuqishme mes dy liderëve globalë, partnerë në inovacion, siguri dhe vizion strategjik.

Nga ana e tij, Modi theksoi se India “e vlerëson thellësisht miqësinë e qëndrueshme me Izraelin, të ndërtuar mbi besimin, inovacionin dhe një angazhim të përbashkët për paqen dhe progresin”.