Ukrainë, 20 të plagosur në sulmet ruse

Rusia nisi një sulm gjatë natës ndaj Ukrainës me dronë dhe raketa, duke plagosur më shumë se 20 persona dhe duke dëmtuar ndërtesa banimi në Kiev dhe në provincat lindore dhe jugore të vendit, vetëm disa orë para se bisedimet SHBA-Ukrainë të rifillonin në Zvicër me qëllim përfundimin e luftës.

Disa shpërthime u dëgjuan gjatë natës në Kiev, raportoi një gazetar i AFP-së. Sipas kreut të komandës ushtarake lokale, Timur Tkachenko, “dronë ofensivë dhe raketa balistike” shënjestruan kryeqytetin ukrainas.

Sulmi goditi tre lagje, tha kryebashkiaku i Kievit, Vitali Klitschko, në Telegram në agim. Klitschko vuri në dukje se mbeturinat dëmtuan një ndërtesë banimi nëntëkatëshe, por nuk pati të lënduar.

Kharkiv, në verilindje, u shënjestrua nga raketa balistike dhe dronë, tha kryetari i qytetit Ihor Terekhov , duke përmendur shpërthimet.

Guvernatori i provincës me të njëjtin emër, Oleh Sinekhubov, shkroi në Telegram se të paktën 14 persona u plagosën, përfshirë një djalë 7-vjeçar, ndërsa shtoi se qyteti u sulmua me dy raketa dhe 17 dronë.

Në qytetin juglindor të Zaporizhias , të paktën shtatë persona u plagosën, sipas Ivan Fedorov , kreut të administratës rajonale. Ai tha se më shumë se 500 shtëpi ishin pa ngrohje dhe 19 pallate u dëmtuan.

Fedorov postoi foto të shtëpive me vrima në mure dhe dyqaneve të shkatërruara.

Në Ukrainën qendrore, në Krivyi Rih, dy persona u plagosën në një sulm rus, sipas kreut të rajonit të Dnipropetrovskit, Oleksandr Ganza.

Provinca e Vinnicës u bë gjithashtu shënjestër e një “sulmi masiv ajror armik”, njoftoi guvernatorja Natalya Zombolotna.

Të dërguarit nga Ukraina dhe Shtetet e Bashkuara do të takohen sot, të enjten, në Gjenevë për të punuar mbi zhvillimin e bisedimeve të reja trepalëshe me Rusinë që synojnë t’i japin fund luftës, e cila ka hyrë në vitin e saj të pestë.