Van Horn shpërndan mesazhin e rëndësishëm: 25 % e prodhimit vendas është nga kompanitë amerikane

Ambasada e Shteteve të Bashkuara në Tiranë ka shpërndarë një mesazh zyrtar këtë të enjte mbi rolin e Dhomës Amerikane të Tregtisë në Shqipëri lidhur me ekonominë shqiptare dhe bashkëpunimin me përfaqësuesit diplomatikë amerikanë.

Në postimin e publikuar në faqen zyrtare të Ambasada e SHBA në Tiranë, theksohet pesha që ka Dhoma Amerikane në zhvillimin ekonomik të vendit dhe duket një foto ku e ngarkuara me Punë e Ambasadës Amerikane Nancy Van Horn është mbledhur me disa drejtues të kompanive dhe përfaqësues të Dhomës Amerikane.

Statusi i plotë:

“Duke përfaqësuar 270 kompani anëtare që gjenerojnë gati 25 përqind të PBB-së së Shqipërisë, Dhoma Amerikane e Tregtisë në Shqipëri është një urë e rëndësishme midis investitorëve amerikanë dhe Shqipërisë, si dhe një motor për rritjen ekonomike. E Ngarkuara me Punë Nancy VanHorn iu bashkua dje Dhomës Amerikane për të diskutuar strategjinë e tyre për rritjen e eksporteve dhe investimeve amerikane dhe krijimin e kushteve të barabarta për të tërhequr më shumë biznese amerikane në Shqipëri.”

Përmes këtij mesazhi, Ambasada nënvizon angazhimin për forcimin e marrëdhënieve ekonomike mes Shqipërisë dhe Shteteve të Bashkuara, me fokus të veçantë te nxitja e investimeve dhe rritja e eksporteve.