Nis rivlerësimi i pronave me 5%, pritet të ulë çmimet e apartamenteve

Në fillim të kësaj jave nisi zbatimi i udhëzimit të ri për rivlerësimin e pasurive të paluajtshme, pas botimit në Fletoren Zyrtare. Dokumenti i Ministrisë së Financave hap rrugën për një proces që do të shtrihet në të gjithë vendin deri në dhjetor 2026.

Fushata e re parashikon një normë tatimore prej 5% për rivlerësimin e pronave, duke ulur ndjeshëm barrën fiskale krahasuar me 15% që aplikohej më parë mbi fitimin nga shitja e pronës.

“Ligji i ri për pronat ul tatimin në 5% mbi fitimin nga shitja. Kjo do të thotë më pak taksë për shitësit dhe më shumë lëvizje në treg për agjencitë imobiliare. Për shembull, nëse prona juaj ka vlerë 100 mijë euro, më parë paguani 15%, ndërsa tani vetëm 5%, pra 5 mijë euro. Mundësia e aplikimit është deri më 31 dhjetor 2026,” – tha Redi Osmanaga, agjent imobiliar.

Ai shtoi se ulja e kësaj takse pritet të rrisë numrin e pronave në shitje dhe mund të ndikojë edhe në çmimet e tregut.

“Për të gjithë të interesuarit, aplikimi për normën 5% mund të bëhet ose përmes agjencive imobiliare, ose pranë zyrës së kadastrës. Besoj se çmimet do të bien, pasi më parë tendenca ishte rritja e tyre për të përballuar taksën 15%,” – theksoi Osmanaga.

Po ashtu, gjatë këtij viti pritet të hyjnë në fuqi çmime të reja reference për pasuritë e paluajtshme në të gjithë vendin, përveç Tiranës, çka mund të ndikojë në rritjen e vlerave të pronave sipas referencës zyrtare.

Rivlerësimi i fundit u zhvillua gjatë periudhës 2020–2022 me një normë tatimore 3%, ku rreth 94 mijë pasuri iu afruan çmimeve të tregut. Nga ajo fushatë, buxheti i shtetit përfitoi 138.6 milionë euro, duke u ndikuar nga niveli i tatimit dhe rritja e çmimeve në treg.