Siguri e ulët, cilat vende evropiane po u bëjnë thirrje qytetarëve të largohen nga Izraeli dhe Irani

Disa vende evropiane kanë lëshuar paralajmërime urgjente për qytetarët e tyre që ndodhen në Izrael, Iran dhe vende të tjera të Lindjes së Mesme, për shkak të përkeqësimit të situatës së sigurisë në rajon.

Italia u ka bërë thirrje qytetarëve të saj të largohen nga Iran, nëse prania e tyre atje nuk është rreptësisht e nevojshme. Në një deklaratë, Ministria e Jashtme e Italisë thekson se kushtet e sigurisë në Lindjen e Mesme mbeten të paqëndrueshme. Udhëtimet drejt Iranit dhe Libanit dekurajohen fuqimisht, ndërsa qytetarëve italianë në Israel u kërkohet të tregojnë kujdes maksimal dhe të qëndrojnë vigjilentë.

Nga ana tjetër, Gjermania ka ashpërsuar këshillat e saj të udhëtimit. Ministria e Jashtme e Gjermanisë këshillon “urgjentisht” qytetarët gjermanë të mos udhëtojnë drejt Izraelit dhe Jeruzalemit Lindor, duke përmendur rritjen e tensioneve në rajon.

Edhe Polonia u ka bërë thirrje shtetasve të saj të largohen menjëherë nga Irani, Izraeli dhe Libani. Sipas njoftimit të Ministria e jashtme polake në platformën X, situata e sigurisë në Lindjen e Mesme është e paqëndrueshme dhe rreziku i përshkallëzimit mbetet i lartë. Autoritetet polake paralajmërojnë se hapësira ajrore mund të mbyllet për trafikun civil, duke e bërë të pamundur ose shumë të vështirë kthimin me avion.