Berisha takon zyrtarin gjerman: Qëndrojmë të vendosur në projektin e integrimit në Europë

Kryetari i Partisë Demokratike Sali Berisha priti në një takim në selinë blu Peter Beyer, Raporter për Shqipërinë në Bundestag.

Në një dalje për mediat pas takimit, Berisha tha se i kishte raportuar zyrtarit të lartë të CDU të gjitha problematikat dhe shqetësimet që ka sot opozita dhe vendi.

“E njoha me të gjitha pikëpamjet e opozitës me këto zhvillime dhe e sigurova se ne qëndrojmë të vendosur në projektin e integrimit të Shqipërisë në Europë, si projekti më i mirë, projekti për të ardhmen më të mirë të Shqipërisë dhe shqiptarëve.

Natyrisht e njoha edhe me pengesat e mëdha, serioze, shumë të mëdha, me gjendjen e bllokimit të plotë të sistemit të drejtësisë, kartelet e drogës dhe fuqinë e tyre shumë të madhe për shkak të lidhjeve të niveleve më të larta dhe vështirësi të tjera me të cilat ne përballemi, por edhe vendosmërinë tonë për të vazhduar përpjekjet në këtë vend që të realizojmë projektet që kemi.

Faleminderit shumë dhe njëherë zoti Beyer për të gjithë mbështetjen dhe interesin tuaj për Shqipërinë dhe shqiptarët”, tha Berisha.