Planet për tarifa hyrjeje në Katedralen e Këlnit shkaktojnë protesta në Gjermani

Planet e Katedrales së Këlnit për të vënë tarifa për vizitorët kanë shkaktuar reagime negative në Gjermani, me shumë njerëz që paralajmërojnë se qasja në katedralen ikonike do të kufizohet vetëm për të pasurit. 

Zyrtarët kanë shpjeguar se katedralja mund të mirëmbahet vetëm me një burim të ri të ardhurash.
Në këtë kontekst, ata njoftuan një plan për të filluar shitjen e biletave nga korriku, me një çmim që varion nga 12 deri në 15 euro.

Njerëzit që hyjnë në kishën kryesore për të marrë pjesë në meshë ose për t’u lutur do të përjashtohen nga tarifa e hyrjes.

Katedralja kushton 16 milionë euro në vit për mirëmbajtje , ndërsa të ardhurat arritën vetëm 14 milionë euro në vitin 2024, një deficit që ka vazhduar që nga viti 2019, sipas faqes së internetit të kishës.

Inflacioni dhe pagat e 170 punonjësve të saj kanë rritur kostot operative të kishës. Në të njëjtën kohë, të ardhurat kanë rënë, pjesërisht për shkak të pandemisë.

Ndërtimi i katedrales filloi në vitin 1248 dhe përfundoi në vitin 1880. Edhe pse u dëmtua rëndë gjatë Luftës së Dytë Botërore, ajo mbetet në këmbë mes rrënojave të qytetit.

Në vitin 1996, ajo u shtua në Listën e Trashëgimisë Botërore të UNESCO-s. Sot, ajo tërheq rreth gjashtë milionë vizitorë në vit.

Në vitin 2007, u instaluan dritare me xham të pikturuar posaçërisht nga piktori Gerhard Richter. Rrezet e diellit depërtojnë nëpër dritaret 20 metra të larta, të cilat janë një atraksion turistik në vetvete.