Rikthehet Gavi, mesfushori i Barcelonës luan sërish pas gjashtë muajsh mungesë

Mesfushori i FC Barcelona, Gavi, është rikthyer në fushë pas gjashtë muajsh mungesë për shkak të një dëmtimi në gjurin e djathtë. Futbollisti iu nënshtrua një operacioni artroskopik në gusht, pasi u dëmtua gjatë stërvitjes.

Trajneri i Barcelonës, Hansi Flick, konfirmoi në konferencën për shtyp para ndeshjes së së dielës kundër Sevilla FC se lojtari kishte marrë dritën jeshile nga stafi mjekësor dhe do të ishte i disponueshëm për disa minuta në fushë.

Rikthimi i tij ndodhi në minutën e 82-të të ndeshjes që Barcelona e fitoi 5-1, kur braziliani Raphinha, autor i tre golave, u zëvendësua nga Gavi. Mesfushori u prit me duartrokitje të forta nga tifozët në Camp Nou.

Pas ndeshjes, Gavi u shpreh i lumtur për rikthimin, duke theksuar mbështetjen e trajnerit Flick gjatë periudhës së rehabilitimit. Ai pranoi se ka kaluar një proces të vështirë rikuperimi, por theksoi se është mirënjohës për besimin që trajneri ka treguar ndaj tij.