Kanabisi mjekësor bën më shumë dëm sesa dobi për shëndetin mendor

Kanabisi mjekësor mund t’u bëjë më shumë dëm sesa dobi njerëzve me çrregullime mendore, sugjeron një studim i ri.

Studimi sugjeron që kanabisi nuk është efektiv në trajtimin e ankthit, depresionit ose sindromës së stresit post-traumatik, pasi nuk u gjetën prova që mbështesin efektivitetin e tij.

Analiza më e madhe e sigurisë dhe efektivitetit të kanabinoideve në një gamë të gjerë gjendjesh mendore vjen ndërsa përdorimi i kanabisit mjekësor rritet në Mbretërinë e Bashkuar dhe SHBA, veçanërisht si një trajtim për ankthin dhe depresionin.

Autori kryesor i studimit, Jack Wilson, nga Qendra Matilda në Universitetin e Sidneit, tha se rezultatet e vënë në pikëpyetje miratimin e kanabisit mjekësor për të trajtuar këto gjendje.

“Edhe pse puna jonë nuk e trajtoi drejtpërdrejt këtë, përdorimi rutinë i kanabisit mjekësor mund të bënte më shumë dëm sesa dobi, duke përkeqësuar rezultatet e shëndetit mendor, për shembull, duke rritur rrezikun e simptomave psikotike dhe zhvillimin e çrregullimeve të përdorimit të kanabisit, si dhe duke vonuar zbatimin e terapive më efektive”, tha ai.

Studimi, i cili analizoi 54 studime të kryera midis viteve 1980 dhe 2005, gjeti disa indikacione se kanabisi mjekësor mund të jetë i dobishëm në raste të caktuara, të tilla si lehtësimi i simptomave të autizmit, pagjumësisë ose sindromës Tourette.

Megjithatë, u theksua se “cilësia e provave është e ulët” dhe se nevojiten kërkime më të gjera, raporton The Times.