Turqia forcon mbrojtjen ajrore, NATO vendos një tjetër sistem Patriot në Adana

NATO po vendos një tjetër sistem mbrojtës raketor amerikan Patriot në provincën jugore turke të Adanas, ku personeli nga Shtetet e Bashkuara dhe vende të tjera janë të vendosur në Bazën Ajrore Incirlik, tha të mërkurën Ministria e Mbrojtjes e Turqisë.

Turqia, e cila ka ushtrinë e dytë më të madhe të NATO-s dhe është fqinje me Iranin, tha javën e kaluar se aleanca kishte vendosur një sistem Patriot në provincën juglindore të Malatya-s, pranë një baze radari të NATO-s, si pjesë e hapave për të forcuar mbrojtjen ajrore kundër kërcënimeve me raketa nga lufta e Iranit.

Adana strehon Bazën Ajrore Incirlik të Turqisë, ku ndodhen personel nga Shtetet e Bashkuara, Katari, Spanja dhe Polonia, si dhe trupa turke.

“Përveç masave kombëtare për sigurinë e hapësirës ajrore dhe të qytetarëve tanë, një sistem shtesë Patriot po vendoset në Adana, i cili u vu në funksion nga Komanda Ajrore Aleate në Ramstein të Gjermanisë, duke plotësuar sistemin spanjoll Patriot tashmë ekzistues në rajon”, tha në një deklaratë Ministria Turke e Mbrojtjes.

Në të njëjtën kohë, Ankaraja thekson se, pavarësisht përpjekjeve për të zhvilluar sisteme vendase, ende nuk ka një mburojë anti-ajrore të zhvilluar plotësisht. Si rezultat, është mbështetur në sistemet e NATO-s të vendosura në Mesdheun lindor.

Sipas burimeve turke, që nga fillimi i luftës, janë rrëzuar tre raketa, të cilat Ankaraja pretendon se u lëshuan nga Irani, gjë që përforcon nevojën për të mbrojtur më tej rajonin.