Përmbytje në Hawaii, mijëra banorë evakuohen për shkak të rrezikut nga shembja e digës

Pas dy stuhive të fuqishme që goditën Hawaiin gjatë javës së kaluar, autoritetet po paralajmërojnë se një nga digat më të mëdha në ishullin Oahu është në rrezik shembjeje të menjëhershme.

Uji po kalonte mbi pjesën e sipërme të digës Wahiawa të enjten në mëngjes sipas orës lokale. Autoritetet lëshuan njoftime për evakuim për dy qytete, Waialua dhe Haleiwa, të cilat tashmë po përballeshin me përmbytje lokale, por mund të përmbyten edhe më shumë nëse diga shembet.

“Janë pak më shumë se 4,000 persona që ndodhen brenda zonës së evakuimit të digës,” tha Molly Pierce, zëdhënëse e Departamentit të Menaxhimit të Emergjencave në Oahu.

Guvernatori i Hawaiit, Josh Green, u bëri thirrje banorëve të ndjekin udhëzimet e autoriteteve të emergjencës.

“Nëse ndodheni në këto zona, ju lutemi evakuohuni menjëherë,” tha ai në një deklaratë.

Diga prej dheu, me gjatësi 660 këmbë, mund të mbajë deri në 9,200 acre-feet ujë. Ajo është e pajisur me një kanal shkarkimi 183 këmbë të gjerë.

“Ajo mund të shembet. Në këtë pikë, nuk kemi një mënyrë të qartë për të përcaktuar nëse rreziku është shembje e menjëhershme apo thjesht tejmbushje” tha Pierce.

Diga është ndërtuar në vitin 1906 dhe është në pronësi të kompanisë Dole Food Company. Ajo mban ujë për ujitje dhe formon një rezervuar të quajtur Lake Wilson, por në një inspektim të vitit 2020 ishte vlerësuar në gjendje “të dobët”, sipas Departamentit të Tokës dhe Burimeve Natyrore të Hawaiit.

Sipas letrës, rreth 2,500 persona mund të jenë në rrezik nëse diga shembet.

Oahu pritet të mbetet nën paralajmërim për përmbytje deri të dielën, tha meteorologu i Shërbimit Kombëtar të Motit, Stephen Parker.

“Kanë rënë 8 deri në 12 inç shi në veriun e Oahut gjatë 12–16 orëve të fundit. Është e vështirë të gjesh një vend ku nuk ka pasur përmbytje”, tha ai.