Takimi Biden-Putin, Çipa: Legjitimon si fuqi të madhe presidentin rus, do ketë edhe vëmendjen e Kinës

Eksperti i çështjeve ndërkombëtare, Akri Çipa u shpreh në Euronews Albania se takimi në Gjenevë mes Joe Biden dhe Vladimir Putin do ketë vëmendjen e madhe të Europës, SHBA-së dhe Rusisë.

Por, ai shtoi se edhe Kina e shikon me vëmendje të veçantë këtë takim, për shkak se aty do profilizohet sesi do të jetë marrëdhënia e SHBA-së me Rusinë në 4 vitet e ardhshme.

Ndërkohë, ai theksoi se ky takim i jep një fuqi të madhe presidentit rus.

“Ky takim i jep një legjitimim si fuqi e madhe z.Putin, është një status që ka kohë që përpiqet ta krijojë për Rusinë, një status që përpiqet t’ia imponojë opinionit rus, duke legjitimuar në një farë mënyre qëndrimin e tij të jashtëzakonshëm në drejtim të shtetit”, u shpreh z. Çipa.

Ai shtoi se edhe Joe Biden në këtë takim ka ardhur me një paketë specifike, ku në të janë një sërë çështjesh.

“Një nga çështjet kryesore që ka interes edhe Europa është ajo e kontrollit të armëve, armëve bërthamore në radhë të parë, por edhe raketave”, tha ai.

“Ndryshimet klimaterike, ngrohja globale, një tjetër kauzë që mund të shërbejë për të përafruar palët dhe për t’u bërë çështje dialogu”, shtoi ai.

Sipas ekspertit një tjetër shqetësim që ka SHBA janë edhe sulmet kibernetike, që Rusia nuk i merr përsipër.

LEXONI GJITHASHTU:

Biden takon Putin në Gjenevë, 4.000 policë dhe ushtarë për sigurinë e dy liderëve

Biden dhe Erdogan zhvillojnë takim e parë në Bruksel, presidenti i SHBA-së e cilëson si pozitiv

Në prag të takimit, Putin: Biden është ndryshe nga Trump, nuk do ketë lëvizje impulsive