Pentagoni shqyrton dërgimin e parashutistëve për pushtim të mundshëm të ishullit Kharg

Pentagoni po shqyrton mundësinë e dërgimit të rreth 3,000 parashutistëve nga Divizioni i 82-të Ajror i SHBA-së si forcë reagimi të shpejtë, për të mbështetur operacione të mundshme në Iran, me synimin – nëse do të jetë e nevojshme – pushtimin e ishullit Kharg, qendra kryesore e eksportit të naftës iraniane.

Sipas raportimit të The New York Times, brigada në fjalë është pjesë e “Immediate Response Force” dhe mund të dislokohet kudo në botë brenda 18 orësh. Në një fazë të mëvonshme, ajo mund të veprojë krah për krah me njësitë e marinsave amerikanë, të cilët tashmë janë në lëvizje drejt rajonit.

Burime ushtarake bëjnë të ditur se marinsat mund të ndërhyjnë të parët për të siguruar dhe riparuar infrastrukturën e aeroportit në ishull, e cila është dëmtuar nga sulmet e fundit ajrore amerikane. Kjo do të mundësonte më pas uljen e avionëve transportues C-130 për të sjellë pajisje, furnizime dhe trupa shtesë.

Ndërkohë, parashutistët e Divizionit të 82-të, edhe pse nuk disponojnë mjete të rënda, pritet të ofrojnë mbështetje të shpejtë në terren dhe mund të zëvendësojnë ose përforcojnë njësitë e marinsave pas fazës fillestare të sulmit.