Katari: Nuk kemi vendosur nëse do të hakmerremi ndaj Iranit

Katari, nëpërmjet zëdhënësit të Ministrisë së Jashtme, Majid Al-Ansari, deklaron se mbi 90% e sulmeve janë “mposhtur”, ndërsa ende nuk është marrë asnjë vendim për hakmarrje kundër Iranit.

I pyetur në lidhje me hakmarrjen e mundshme ndaj sulmeve iraniane ndaj Katarit, al-Ansari tha se Katari “rezervon të drejtën për t’u hakmarrë”, por kërkon të punojë drejt “paqes rajonale” në vend të përshkallëzimit të situatës.

“Ne rezervojmë të drejtën për t’u hakmarrë në një mënyrë që respekton të drejtën ndërkombëtare, por gjithashtu merr parasysh faktin se ne do të jetojmë në këtë rajon për një kohë të pacaktuar, dhe për këtë arsye duhet të bashkëpunojmë për paqen në rajon dhe jo për përshkallëzimin e tensionit”, tha ai.

“Vendimi për hakmarrje do të merret sipas vlerësimit të situatës që vjen nga forcat tona të armatosura dhe vendimeve të udhëheqësve tanë. Ende nuk është marrë një vendim i tillë, por ne po marrim çdo masë paraprake të mundshme, çdo masë të mundshme në qëndrimin tonë mbrojtës për të siguruar që këto sulme (nga Irani) të shmangen.” 

Ai theksoi se “tani i takon Iranit të vendosë se si ta rivendosë besimin që u humb pas sulmit ndaj sovranitetit tonë”, tha ai në mënyrë karakteristike.