“Tragjedi e re”, OBSH: Nëntë mjekë janë vrarë në Liban, të ndalen sulmet ndaj stafit mjekësor

Drejtori i përgjithshëm i Organizatës Botërore të Shëndetësisë, Tedros Adhanom Ghebreyesus, ka bërë thirrje që sulmet ndaj stafit mjekësor të ndalen, pasi nëntë ndihmës mjekësorë u raportuan të vrarë këtë të shtunë në Liban.

Ghebreyesus tha se mjekët vdiqën në pesë sulme të ndara, duke e çuar numrin e punonjësve të shëndetësisë të vrarë këtë muaj në 51. Gjithashtu thuhet se janë plagosur edhe shtatë mjekë.

“Tragjedi e re në Libanin jugor sot. Marsi ka qenë muaji i dytë më vdekjeprurës për punonjësit e shëndetësisë në Liban që kur OBSH filloi të monitorojë sulmet ndaj kujdesit shëndetësor në vend në tetor 2023. Më shumë se 120 punonjës shëndetësorë thuhet se janë plagosur që nga fillimi i përshkallëzimit në Liban më 2 mars, kryesisht në jug të vendit. Punonjësit e shëndetësisë janë të mbrojtur sipas ligjit ndërkombëtar humanitar dhe nuk duhet të jenë kurrë shënjestër e sulmeve. E vetmja mënyrë për t’i dhënë fund këtyre tragjedive është t’i japim fund sulmeve ndaj kujdesit shëndetësor, tani”, ka shkruar ai në rrjetin social.

Shefi i OBSH-së tha gjithashtu se katër spitale dhe 51 qendra të kujdesit shëndetësor parësor në Liban ishin aktualisht të mbyllura, “duke kufizuar ndjeshëm aksesin në kujdesin thelbësor në një kohë kur është më i nevojshëm”.