Planifikuan sulm në një bankë në Paris, arrestohen edhe dy të dyshuar të tjerë

Autoritetet franceze kanë  arrestuar dy persona të tjerë të dyshuar për përfshirje në sulmin e dështuar me bombë në një bankë në Paris. Sipas Zyrës së Prokurorit Kombëtar Antiterrorizëm, Arrestimi i të dyve u bë në orët e para të së dielës, ndërsa një i mitur u identifikua dhe u ndalua të shtunën.

Në total, tre persona janë tani në paraburgim në lidhje me rastin, të cilin Ministri i Brendshëm Francez Laurent Nunes e ka lidhur me luftën në Lindjen e Mesme.

Ngjarjet u zhvilluan në orët e para të së shtunës përpara ndërtesës së Bankës së Amerikës, e cila ndodhet në një lagje të shtrenjtë të kryeqytetit francez.

Policia arrestoi një burrë i cili sapo kishte vendosur një pajisje shpërthyese të improvizuar. Ai po përgatitej ta shpërthente pajisjen me një çakmak.

Autori shoqërohej nga një person i dytë i cili iku në këmbë. Sipas raportimeve fillestare, dy burrat mbërritën në këmbë përpara bankës amerikane. Ndërsa burri i parë e vendoste pajisjen, i dyti bëri një hap prapa, me sa duket për të bërë foto ose video me telefonin e tij celular.

I mituri i arrestuar tha se ishte rekrutuar nëpërmjet aplikacionit Snapchat për të kryer këtë operacion në këmbim të shumës prej 600 eurosh.