Sulmet amerikane-izraelite godasin objekte shëndetësore në Iran

Bombardimet e përbashkëta SHBA-Izrael ndaj Iranit kanë goditur ditët e fundit disa objekte të rëndësishme shëndetësore, duke ngritur shqetësime të mëdha nga agjencitë e ndihmës dhe institucionet vendase.

Sipas mediave shtetërore iraniane, një nga prodhuesit më të mëdhenj të ilaçeve kundër kancerit dhe anestetikëve në vend është goditur të martën. Televizioni shtetëror IRIB raportoi se fabrika pësoi dëme të konsiderueshme si pasojë e sulmit.

Ndërkohë, më herët gjatë javës, Spitali Psikiatrik i sapondërtuar “Delaram Sina” në Teheran u dëmtua rëndë nga një tjetër sulm ajror. Agjencia shtetërore e lajmeve IRNA bëri të ditur se rreth 30 pacientë ndodheshin në ambientet e spitalit në momentin e sulmit, sipas deklaratës së drejtorit të institucionit.

Autoritetet iraniane raportojnë se ofensiva e vazhdueshme ka shkaktuar shkatërrime të mëdha, duke goditur lagje të tëra, duke lënë qindra viktima dhe duke dëmtuar rëndë shërbimet jetike. Sipas zëvendësministrit të shëndetësisë, të paktën 190 qendra shëndetësore dhe mjekësore janë prekur që nga fillimi i konfliktit më 28 shkurt.