Tërmet i fortë godet Indonezinë, një person humbet jetën! Sa ishte magnituda

Një tërmet me magnitudë 7.6 ballë të Rihterit goditi Detin Molucca Verior të Indonezisë të enjten, duke vrarë një person, duke dëmtuar ndërtesa dhe duke shkaktuar valë cunami, thanë autoritetet dhe dëshmitarët.

Agjencia meteorologjike e Indonezisë, BMKG, tha se u raportuan valë cunami në pesë lokacione, më e larta me 0.75 m në Minahasa Veriore në Sulawesi Verior dhe u monitoruan rreth 50 lëkundje pasuese, më e madhja me magnitudë 5.8 ballë.

Shefi i BMKG-së, Teuku Faisal Fathani, fillimisht tha se modelimi tregonte se kishte potencial për cunami për valë me lartësi nga 0.5 m deri në 3 m, por agjencia e hoqi paralajmërimin për cunami më vonë të enjten në mëngjes.

Autoritetet amerikane të paralajmërimit për cuname fillimisht thanë gjithashtu se cuname të rrezikshme ishin të mundshëm përgjatë brigjeve të Indonezisë, Filipineve dhe Malajzisë, por më vonë e hoqën paralajmërimin për kërcënim.

Një person u vra nga rrënojat në qytetin Manado, pasi një pjesë e një ndërtese u shemb, u tha gazetarëve zëvendësshefi i policisë së Sulawesi-t të Veriut, Awi Setiyono.

Indonezia është një pjesë tektonikisht komplekse e “Unazës së Zjarrit të Paqësorit”, një brez sizmikisht aktiv vullkanesh që shtrihet nga Amerika e Jugut në Lindjen e Largët Ruse.