Gjendet i pajetë një i moshuar në Korçë, dyshohet se është vrarë

Një ngjarje e rëndë është regjistrua pak orë më parë në fshatin Bulgarec të Korçës, ku policia ka gjetur të pajetë një person të moshuar.

Sipas raportimeve paraprake, i moshuari është Gëzim Vija, 78 vjeç, i cili u gjet pa shenja jete brenda banesës së tij nga fqinjët, të cilët kanë njoftuar menjëherë policinë. Jashtë kamerave, fqinjët thanë se kishin vënë re dritaren e thyer të banesës së 78-vjeçarit dhe hynë menjëherë brenda, ku gjetën të moshuarin të vdekur.

Ekspertiza paraprake tregon shenja dhune, nga të cilat besohet se ka ardhur vdekja e 78-vjeçarit.

Ndërkohë, policia po heton pistën e grabitjes, për shkak të dëmtimit të dritares dhe mungesës së një sasi parash dhe orendish në banesë.

Pritet që trupi të dërgohet në morg, ndërsa forcat e rendit po shqyrtojnë kamerat përreth lagjes për të mbledhur të gjitha provat e mundshme.