Pastrimi i kanalit të ujërave të larta në Vlorë, IMT shemb dy godina

Dy banesa të ndërtuara mbi kanalin e ujërave të larta në qytetin e Vlorë janë prishur këtë të martë, pasi shkaktonin probleme serioze në funksionimin normal të kanalit dhe rrezikonin përmbytje në zonë.

Aksioni u realizua nga Inspektorati i Mbrojtjes së Territorit në bashkëpunim me Policinë e Shtetit. Në terren ishte e pranishme edhe kryetarja e Bashkisë së Vlorës, Brunilda Mersini e cila deklaroi se ndërhyrja ka për qëllim lirimin e plotë të kanalit dhe rikthimin e funksionimit normal të tij, duke parandaluar përmbytjet. Ajo shtoi se aksioni do të vijojë edhe në ditët në vijim, deri në pastrimin përfundimtar të kanalit nga çdo ndërtim i paligjshëm.

Familjet e prekura do të trajtohen me mbështetje sociale, përmes bonusit të banesës dhe programeve të strehimit social, bëri të ditur kryetarja e bashkisë.