Argjentina miraton projektligjin që lehtëson nxjerrjen e minierave në rajonet akullnajore

Kongresi i Argjentinës ka miratuar një amendament që e bën më të lehtë nxjerrjen e minierave në rajonet akullnajore. Një miratim që ambientalistët thonë se dobëson mbrojtjen për burimet thelbësore të ujit.

Ligji për Akullnajat, i miratuar në vitin 2010, ndaloi të gjitha aktivitetet e minierave dhe eksplorimit në rajonet akullnajore duke i mbrojtur ato si rezerva ujore.

Reforma e zhvendos përgjegjësinë e përcaktimit të zonave të mbrojtura të akullnajave nga Instituti Argjentinas për Shkencat e Borës, Akullit dhe Mjedisit (Ianigla) te qeveritë provinciale.

Presidenti Javier Milei, i cili mbështeti reformën, tha se ndryshimi i fuqizon provincat të shfrytëzojnë burimet e tyre dhe lejon aktivitetet minerare atje ku nuk kishte asgjë për të mbrojtur.

Senati i Argjentinës e kishte miratuar projektligjin në shkurt të vitit 2026, kështu që miratimi nga dhoma e ulët ishte pengesa e fundit e madhe e mbetur.

Kundërshtarët e reformës argumentuan se kjo do të vinte në rrezik një burim themelor, ujin.

“Pa ujë, ne as nuk mund të mendojmë për një projekt rritjeje dhe zhvillimi”, tha kongresmenja Natalia de la Sota.

Në Argjentinë ka 16,968 akullnaja, të cilat furnizojnë me ujë 36 pellgje lumenjsh në 12 provinca, ku jetojnë shtatë milionë njerëz.

Uji nga akullnajat e shkrira ndihmon në zvogëlimin e ndikimit të thatësirave – veçanërisht në provincat gjysmë të thata si Mendoza – të cilat po bëhen më të zakonshme për shkak të ndryshimeve klimatike.