Fushata antikorrupsion në Pekin, shkarkohet zëvendësministri i jashtëm kinez

Diplomati i lartë kinez Sun Weidong është shkarkuar nga posti i tij si zëvendësministër i Punëve të Jashtme, në rastin më të fundit të një zyrtari të lartë që largohet nga detyra nga Pekini.

Ministria e Burimeve Njerëzore njoftoi lajmin në një postim të shkurtër në faqen e saj të internetit të martën, 14 prill, duke cituar një vendim të Këshillit të Shtetit, organi më i lartë i pushtetit shtetëror në Kinë. Postimi nuk tregonte pse apo kur Sun ishte shkarkuar, por faqja e Ministrisë së Punëve të Jashtme tregon se angazhimet e tij të fundit publike ishin takime me ambasadorët e Bruneit dhe Malajzisë në Kinë më 13 mars.
Dy ditë më parë, Sun ishte takuar me ambasadorin e Pakistanit në Kinë për të diskutuar bashkëpunimin dypalësh, sipas një postimi në llogarinë X të diplomatit Khalil Hashmi.

Shkarkimet e këtij lloji në qeverinë kineze zakonisht tregojnë masa disiplinore në nivel të lartë dhe shpesh pasohen nga lajme për një hetim.

Njoftimi për shkarkimin e Sun përfshinte edhe largimin e një zyrtari tjetër, An Lusheng, nga posti i zëvendësdrejtorit të Administratës Kombëtare të Hekurudhave.

Që kur mori pushtetin në vitin 2012, Presidenti Xi Jinping ka zhvilluar një fushatë të gjerë kundër korrupsionit që synon “tigrat dhe mizat”, pra zyrtarët e nivelit të lartë dhe të ulët.

Vitin e kaluar, Kina hetoi më shumë se një milion raste korrupsioni dhe ndëshkoi 938 mijë persona, sipas Komisionit Qendror për Inspektimin e Disiplinës dhe Komisionit Kombëtar të Mbikëqyrjes.

Lista e rasteve që përfshinin masa disiplinore përfshinte 69 zyrtarë në nivel provincial ose ministror, 4 mijë e 155 zyrtarë në nivel zyre, 35 mijë zyrtarë në nivel qarku dhe 125 mijë zyrtarë në nivel komune, sipas raportit vjetor të komisionit. Edhe zyrtarë të lartë ushtarakë kinezë janë përfshirë në fushatën anti-korrupsion të Xi Jinping.