Amnisti për separatistët katalanas, qeveria spanjolle ka vendosur të falë 9 zyrtarët e burgosur

Ditën e martë qeveria spanjolle do të amnistojë nëntë zyrtarë katalanas të burgosur gjatë referendumit për pavarësi në vitin 2017. Vendimi u konfirmua nga kryeministri spanjoll, Pedro Sanchez, i cili mbajti një fjalim para shoqërisë katalanase duke dhënë shpjegime për vendimin pasi mori edhe mbështetjen e sektorit të biznesit. Sipas tij, qëllimi kryesor është rivendosja e harmonisë dhe bashkëjetesës.

“Dhe kjo është çka qeveria e Spanjës ka vendosur: të përballet me problemin, të kërkojmë harmoninë. Prandaj që ditën e nesërme, në bazë të parimit të bashkëjetesës, unë do t’i propozoj Këshillit të Ministrave të amnistojë nëntë zyrtarët katalnas që ndodhen në burg”, u shpreh z. Sanchez.

I ndërprerë disa herë nga thirrjet për “amnisti” për politikanët dhe aktivistët e burgosur në 2017-n për rolin e luajtur në tentativën për të shpallur pavarësinë, Pedro Sanches tha se ai kërkon ribashkimin e të gjithë rajoneve.

“E ardhmja ka rëndësi më të madhe se sa e kaluara. Kjo është arsyeja që qeveria spanjolle ka zgjedhur rrugën e ribashkimit dhe harmonisë. Dhe ne besojmë se kjo rrugë do të na çojë drejt mundësisë për një fillim të ri dhe për ti bërë gjërat në mënyrën e duhur”, tha Pedro Sanchez.

Lëvizja e qeverisë spanjolle është debatuar shumë. Nga njëra ana, separatistët thonë se amnistia është një “zgjidhje e jo e plotë” dhe për këtë, qindra protestues pro – pavarësisë u mblodhën jashtë teatrit ku ndodhej kryeministri Pedro Sanchez duke kërkuar amnisti të plotë.

Në anën tjetër, opozita e ekstremit të majtë akuzon qeverinë se po ia “shet Spanjën” nacionalistëve. Dekretet mbi faljen e zyrtarëve katalanas do të prezantohen nga vetë kryeministri Sanchez me 30 qershor.

LEXONI GJITHASHTU:

Carles Puigdemont, Parlamenti Europian voton për heqjen e imunitetit të separatistëve katalanas