Balla përfundon dëshminë për “Partizanin”: Shpresoj  të thirrem edhe për 21 janarin

Kreu i grupit të PS, Taulant Balla përfundoi pas disa orësh dëshminë në GJKKO për dosjen Partizani. Balla u shpreh se është i kënaqur me ecurinë e dosjes nisur nga fakti që kërkesa e tij për shpërdorim detyre u kalua në korrupsion.

Kreu i grupit parlamentar të PS u shpreh se do të ishte edhe më i kënaqur nëse do të thirrej edhe për dosjen e 21 janarit për të cilën  ka bërë gjithashtu një kallëzim.

“Fakti që në bankën e të akuzuarve ka persona që këto 35 vite kanë qeverisur vendin dhe akuzohen për korrupsion dhe fshehje të pasurisë është lajmi mirë për të gjithë shqiptarët. Uroj që procesi të jetë i drejtë dhe përgjegjësia penale të shkojë tek të gjithë personat me përgjegjësi. Nuk jam nga ata persona që kam bërë kallëzim penal me emër tjetër dhe i kam qëndruar atij kallëzimi penal të bërë në nëntor 2020. Drejtësia vonon dhe nuk harron. Privatizimi i Partizanit, fusha sportive që sot mund të ishin të dobi të të rinjve, sot janë 17 kulla që kanë prodhuar pasuri. Uroj që në vijim të jem këtu edhe për një kallëzim tjetër, që është kallëzimi për 21 janarin. Prej 21 marsit 2011 kur kam depozituar kallëzimin e parë, edhe familjarët e viktimave të 21 janarit, ka një vendim të Gjykatës së Lartë dhe Strasburgut për 21 janarin, shpresoj që edhe për këtë çështje të më jepet mundësia si dëshmitar”, tha Balla.