Trump: Iranianët nuk kanë asnjë shans, ata po negociojnë

Presidenti amerikan Donald Trump e ka përshkruar konfliktin e vazhdueshëm me Iranin si një “përleshje”, duke deklaruar se iranianët “nuk patën kurrë një shans dhe e dinë këtë”, ndërsa shtoi se këtë ia thonë edhe gjatë komunikimeve mes palëve.

Duke folur nga Zyra Ovale, Trump iu drejtua edhe një grupi fëmijësh, ku theksoi se Shtetet e Bashkuara nuk mund të lejojnë Iranin të pajiset me armë bërthamore.

“Nuk mund ta lejojmë Iranin të ketë një armë bërthamore. Ju mund të jeni shumë të vegjël për këtë, por ndoshta kuptoni më shumë se kushdo. Nuk mund të lejojmë që një grup të çmendurish të kenë një armë bërthamore”, u shpreh ai.

Në deklaratat e tij, Trump tha gjithashtu se “iranianët po negociojnë”, duke i cilësuar ata si “njerëz të sëmurë” dhe duke përsëritur se SHBA nuk do të lejojë që “njerëz të çmendur” të zotërojnë armë bërthamore.