Ndërhyrjet digjitale për shëndetin mendor, risi për Shqipërinë

Problemet e shëndetit mendor po shtohen vazhdimisht, ndërsa një pjesë e mirë e personave të prekur nuk marrin trajtim për shkak të stigmës sociale. Për të thyer këto barriera, veçanërisht tek të rinjtë, në Shqipëri po zhvillohen dy studime që synojnë ofrimin e shërbimeve digjitale për shëndetin mendor.

Të dhënat tregojnë se rreth 17% e popullsisë në Europë, përfshirë edhe Shqipërinë, përballet me probleme të shëndetit mendor. Këto shqetësime lidhen kryesisht me simptomat e ankthit, çrregullimet e humorit dhe depresionin.

Ekspertët theksojnë se stigma mbetet një nga pengesat kryesore për kërkimin e ndihmës profesionale.

“Shumë njerëz kanë ende turp të flasin për problemet e shëndetit mendor dhe stigma mbetet e lartë. Sot flitet më shumë se më parë, por sërish ka barriera. Burnout-i, që vjen si pasojë e lodhjes dhe stresit të vazhdueshëm, është një problem shqetësues që jo gjithmonë diagnostikohet.”-tha Genta Qirjako, Universiteti i Mjekësisë.

Me mbështetjen e Komisionit Europian, dy studimet e reja fokusohen tek ndërhyrjet digjitale për parandalimin dhe trajtimin e formave të lehta të problemeve të shëndetit mendor.

“Qëllimi është të ndihmojmë të rinjtë dhe adoleshentët të gjejnë mënyra më pak stigmatizuese për të marrë shërbim. Këto ndërhyrje lidhen kryesisht me parandalimin e depresionit dhe përmirësimin e shëndetit mendor në vendin e punës. Synimi është që njerëzit të marrin ndihmë pa stigma dhe pa barriera.” tha Genta Qirjako, Universiteti i Mjekësisë.

Sipas statistikave të publikuara, 1 në 6 persona në rajon jeton me probleme të shëndetit mendor dhe 1 në 3 nuk trajtohet. Ndërkohë, 11% e adoleshentëve shfaqin probleme të shëndetit mendor, ndërsa vajzat rezultojnë më të prekura. Rreth 25% e tyre raportojnë ndjenjë vetmie, një fenomen që shfaqet edhe tek 1 në 4 persona mbi moshën 60 vjeç. Ekspertët theksojnë se fokusi kryesor mbetet reduktimi i faktorëve të rrezikut dhe rritja e aksesit në shërbime mbështetëse.