VIDEO/ Inter mposht Lazion dhe “rrëmben” Kupën e Italisë, zikaltërit e papërmbajtshëm

Inter konfirmoi dominimin në futbollin italian duke fituar për herë të parë që nga viti 2010 titullin kampion dhe Kupën e Italisë në të njëjtin sezon.

Skuadra zikaltër mposhti Lazion me rezultatin 2-0 në finalen e Kupës së Italisë, duke i shtuar trofeut të kupës edhe titullin e Serie A, të siguruar tre javë para fundit të kampionatit.

Ky sukses rikthen kujtimet e vitit 2010, kur Interi i drejtuar nga Jose Mourinho fitoi tripletën historike, përfshirë edhe Ligën e Kampionëve.

Trajneri aktual, Christian Chivu, po fiton shpejt vlerësime në stolin zikaltër. Ish-mbrojtësi rumun, pjesë e ekipit legjendar të vitit 2010, mori drejtimin e skuadrës pas largimit të Simone Inzaghi në fund të sezonit të kaluar.

Kapiteni Lautaro Martenez nuk kurseu elozhet për trajnerin e tij pas finales.

“Çfarë note do t’i jepja Chivu-t? Dhjetë nga dhjetë”, deklaroi sulmuesi argjentinas.

Ai theksoi se rikthimi te trofetë nuk ishte i lehtë pas zhgënjimeve të sezonit të kaluar, kur Interi humbi titullin e Serie A për vetëm një pikë ndaj Napolit, u eliminua në gjysmëfinalet e Kupës së Italisë dhe u mposht rëndë 5-0 nga PSG në finalen e Ligës së Kampionëve.

Finalja në Romë u vendos nga dy gabime të Lazios. Në minutën e 14-të, pas një goditjeje nga këndi të Federico Dimarcos, mbrojtësi Adam Marusiç devijoi topin në portën e tij.

Goli i dytë erdhi pas një gabimi të Nuno Tavares, të cilit iu vodh topi nga Denzel Dumfries pranë zonës. Holandezi pasoi për Lautaron, që e dërgoi lehtësisht topin në rrjetë për 2-0.

Interi kishte triumfuar edhe pak ditë më parë ndaj Lazios me rezultatin 3-0 në kampionat, në atë që u konsiderua prova gjenerale për finalen e Kupës së Italisë.