Gjykata norvegjeze bllokon ekstradimin në Greqi të aktivistit për të drejtat e emigrantëve

Vendimi i një gjykate apeli norvegjeze për të hedhur poshtë ekstradimin e një aktivisti të akuzuar për lehtësimin e hyrjes së paligjshme të njerëzve në Greqi është përshëndetur si një fitore e rrallë për të drejtat e njeriut.

Gjykata hodhi poshtë unanimisht kërkesën duke thënë se veprimet e tij jo vetëm ishin të ligjshme, por edhe të mbrojtura sipas traktateve ndërkombëtare të cilave u përmbaheshin të dy vendet.

Zacharias Kesses, që drejton ekipin ligjor të Tommy Olsen në Athinë, tha: “Është një vendim unik. Bllokimi i një kërkese për ekstradim në kontinentin e Evropës është i padëgjuar, prandaj kjo është gjithashtu një fitore e tillë për të drejtat e njeriut. Tommy u ngarkua me monitorimin dhe raportimin e njerëzve në vështirësi në det, një absurditet që gjykata norvegjeze e pranoi.”

Olsen u arrestua në shtëpinë e tij në kryeqytetin arktik të Tromso-s më 16 mars, pas një urdhër-arresti evropian të lëshuar nga Greqia. Një gjykatë e rrethit fillimisht e mbështeti kërkesën. Aktivisti e kundërshtoi vendimin para gjykatës së apelit të Halogaland në Tromso.

Duke shpjeguar vendimin e saj, gjykata e apelit përmendi rrezikun që i kanoset lirisë së shprehjes së Olsenit – një nen themelor i konventës evropiane për të drejtat e njeriut – nëse do të ndodhte ekstradimi. Ajo deklaroi gjithashtu se sipas ligjit norvegjez veprimet e tij, të cilat përfshinin regjistrimin e shkeljeve, komunikimin me refugjatët dhe ndihmën në procedurat e azilit, nuk konsideroheshin vepra penale.

Autoritetet e prokurorisë në Norvegji të martën e bënë të qartë se nuk do të apelojnë kundër vendimit. Raporti i Varkave të Egjeut, i themeluar nga Olsen në vitin 2017, kishte shprehur shpesh shqetësim në lidhje me praktikën e supozuar të “kthimeve mbrapsht” të emigrantëve në Egje.

Autoritetet greke gjithmonë i kanë mohuar dëbimet me forcë pavarësisht provave, të përshkruara si të pakundërshtueshme, nga mbrojtësit e të drejtave të njeriut.

Autoritetet greke, të cilat ende nuk i janë përgjigjur vendimit, paraqitën kërkesën për ekstradim në fillim të këtij viti, duke pretenduar se Olsen drejtonte një organizatë kriminale për të kontrabanduar njerëz në vend.

Grupet e të drejtave të njeriut, përfshirë Amnesty International, i kishin kërkuar Norvegjisë të mos e ekstradonte Olsenin, duke argumentuar se arrestimi i tij buronte nga keqpërdorimi i legjislacionit kundër kontrabandës dhe në fund të fundit kishte për qëllim të ftohte lëvizjen e solidaritetit me emigrantët.