Stambolli do të mirëpresë Samitin Global të Ekonomisë Islamike, çfarë përfshin ky organizim

Stambolli do të mirëpresë më 3-6 qershor Samitin e 3-të Global të Ekonomisë Islamike, një ngjarje ndërkombëtare që do të mbledhë politikëbërës, guvernatorë të bankave qendrore, investitorë, akademikë dhe përfaqësues të institucioneve financiare nga vende të ndryshme të botës.

Samiti katërditor organizohet nga Forumi i Ekonomisë Islamike AlBaraka në kuadër të AlBaraka Summits Türkiye dhe do të zhvillohet në selinë e Halkbank në Qendrën Financiare të Stambollit.

Tema kryesore e këtij viti, “Kapitali në Ekonominë Islame: Strukturimi i Pasurisë për Zhvillim të Qëndrueshëm”, do të fokusohet në financat etike, zhvillimin e qëndrueshëm dhe perspektivat e ardhshme të ekonomisë dhe financave islame.

Në kuadër të samitit do të zhvillohen sesione mbi inteligjencën artificiale, transformimin dixhital, kapitalin dixhital, inovacionin financiar, fintech-un islamik, ekosistemet e qëndrueshme të likuiditetit dhe sipërmarrjen rinore. Agjencia Anadolu do të jetë partneri global i komunikimit të eventit.

Një nga sesionet kryesore do t’i kushtohet rolit të teknologjisë dhe inovacionit financiar në financat islame, me fokus përdorimin e inteligjencës artificiale në vlerësimin e kreditit, menaxhimin e riskut, pajtueshmërinë e automatizuar dhe tokenizimin e aseteve në përputhje me parimet e Sheriatit.

Samiti do të përfshijë gjithashtu një panel të posaçëm me guvernatorë të bankave qendrore dhe ministra të financave, i moderuar nga Mahmoud Mohieldin, i dërguari special i OKB-së për financimin e Axhendës 2030 për Zhvillim të Qëndrueshëm.

Mes pjesëmarrësve do të jenë guvernatori i Bankës Qendrore të Turqisë, Fatih Karahan, guvernatori i Bankës Negara të Malajzisë, Abdul Rasheed Ghaffour, si dhe guvernatori i Autoritetit Monetar të Palestinës, Yahya Jawdat Hafez Shunnar.

Diskutimet do të përqendrohen te stabiliteti financiar, qeverisja e flukseve të kapitalit, likuiditeti i qëndrueshëm dhe forcimi i qëndrueshmërisë ekonomike në nivel global.