Austria gjykon ish-shefin e inteligjencës siriane në Raka për tortura

Një ish-shef i inteligjencës siriane në qytetin e Rakas doli në gjyq në Austri të hënën me akuzat për torturë dhe abuzim seksual për keqtrajtimin e kundërshtarëve të udhëheqësit të atëhershëm Bashar al-Assad më shumë se një dekadë më parë.

Gjyqi, që pritet të zgjasë një muaj, do të përfshijë dëshmitë e viktimave të dyshuara. I pandehuri kryesor, i identifikuar vetëm si Khaled al-H sipas rregullave austriake të privatësisë, ishte kreu i Drejtorisë së Përgjithshme të Inteligjencës së Sirisë në Raka që nga kryengritja kundër Assadit në vitin 2011 deri në marrjen e qytetit nga Ushtria e Lirë Siriane në vitin 2013, të cilën ai thotë se e ndihmoi përpara se të largohej të nesërmen.

I pandehuri i dytë ishte një zyrtar i lartë i policisë në Raka me nofkën “Engjëlli i Vdekjes”, sipas prokurorisë. Të dy akuzohen për shkaktim të lëndimeve të rënda trupore, shtrëngim të rënduar dhe sulm seksual.

Vetëm Khaled al-H akuzohet për torturë. Ata përballen me deri në 10 vjet burg nëse dënohen. Të dy deklaruan se nuk ishin fajtorë dhe mohuan çdo përfshirje në tortura ose aktivitete të ngjashme.

“E pamundur. Kjo nuk do të ishte në interesin tim. Gjithashtu nuk është mënyra se si jam rritur”, tha Khaled al-H, i cili është anëtar i pakicës druze të Sirisë, kur kryetari i trupit gjykues e pyeti nëse kishte përdorur dhunë kundër ndonjërit në paraburgimin e tij.

Prokuroria përshkroi qelitë e mbushura me 30 ose 40 persona dhe abuzim sistematik, me rojet që i rrihnin të burgosurit dhe i spërkatnin me ujë të ftohtë si për të zvogëluar shenjat e abuzimit ashtu edhe për t’i bërë rrahjet e ditës tjetër të dhimbshme më shumë.