Merren peng disa persona në një ndërtesë në Kaliforni, ndërhyn FBI pas kërcënimit me bombë

Një burrë u mbyll brenda një ndërtese në shtetin e Californisë, duke mbajtur peng një numër personash, pasi autoritetet morën raportime për një kërcënim me bombë.

Incidenti ndodhi në qendër të qytetit Bakersfield, ku disa persona ndodheshin brenda ndërtesës kur policia mbërriti në vendngjarje. Sipas zëdhënëses së policisë, Sally Selby, po punohet për të arritur një zgjidhje paqësore.

Autoritetet njoftuan se gjatë mbrëmjes u liruan dy persona të marrë peng. Deri tani nuk raportohet për të lënduar.

Policia bëri të ditur se Ekipi i Negocimit të Krizave i Departamentit të Policisë së Bakersfield vazhdon të mbajë kontakte me të dyshuarin. Më herët, polici Eric Celedon deklaroi se negociatorët lokalë dhe ata të FBI-së kishin siguruar se personat e mbetur brenda dukeshin në gjendje të mirë shëndetësore.

Rreth orës 23:00, autoritetet konfirmuan se një zëdhënës i policisë kishte marrë drejtimin e operacioneve SWAT në vendngjarje.

Ndërtesa në vendngjarje mësohet se përmban edhe zyra të tjera biznesi.

Pas mbërritjes në vendngjarje, oficerët ngritën një perimetër sigurie, ndërsa disa persona arritën të evakuoheshin. Autoritetet gjithashtu pastruan zonën përreth dhe mbyllën rrugët aty pranë për arsye sigurie.