Numri i rasteve të konfirmuara me Ebola rritet në 452 në Kongo, 82 viktima

Republika Demokratike e Kongos tha të premten se numri i rasteve të konfirmuara me Ebola ishte rritur në 452, pasi 71 raste të reja u konfirmuan në 24 orët e mëparshme. Rastet e konfirmuara përfshijnë 82 vdekje, treguan të dhënat qeveritare.

Nga ana tjetër Organizata Botërore e Shëndetësisë dhe Africa CDC nisën të premten një plan të përbashkët reagimi ndaj shpërthimit të Ebolës, duke kërkuar 518 milionë dollarë për të përmbajtur përhapjen e virusit në Kongo dhe për të parandaluar zgjerimin e tij në rajon.

Drejtori i Përgjithshëm i OBSH-së, Tedros Adhanom Ghebreyesus deklaroi pas një vizite në provincën Ituri se ekipet shëndetësore ende po përpiqen të përballojnë ritmin e përhapjes së virusit.

“Shpërthimi po përparon me shpejtësi”, tha Tedros gjatë një konference të përbashkët për shtyp, duke theksuar se përgjigja efektive kërkon udhëheqje të fortë qeveritare, përfshirje të komuniteteve dhe koordinim të ngushtë mes partnerëve ndërkombëtarë.

Plani i përbashkët, i hartuar nga OBSH-ja, Africa CDC dhe organizata partnere, mbështetet në parimin “një plan, një buxhet, një ekip” dhe përfshin koordinimin e emergjencave, mbikëqyrjen epidemiologjike, testimet laboratorike, parandalimin e infeksioneve, trajtimin klinik, angazhimin e komunitetit, kërkimin shkencor dhe logjistikën.