Përshkallëzohen sulmet e pushtuesve izraelitë, djegin automjete dhe sulmojnë xhaminë në Bregun Perëndimor

Kolonë izraelitë sulmuan disa zona palestineze në Bregun Perëndimor të pushtuar të dielën, duke djegur automjete dhe duke dëmtuar një xhami, ndërsa operacionet e ushtrisë izraelite vazhduan në qytete dhe fshatra të ndryshme të rajonit.

Sipas burimeve lokale, në fshatin Deir Abu Mashal, në veriperëndim të Ramallahut, kolonët sulmuan banorë palestinezë që po shkonin drejt tokave të tyre bujqësore. Ata hodhën gurë ndaj civilëve, çka shkaktoi përplasje në zonë, përpara ndërhyrjes së forcave izraelite. Nuk u raportuan të lënduar apo arrestime.

Në një incident tjetër në qytetin Deir Dibwan, në lindje të Ramallahut, kolonët dogjën dy automjete dhe vandalizuan dy të tjera pranë hyrjes perëndimore të zonës. Dëshmitarët thanë se automjetet pësuan dëme të konsiderueshme përpara se autorët të largoheshin.

Ndërkohë, në fshatin Burqa, kolonët i vunë flakën një automjeti pranë Xhamisë Al-Nour dhe tentuan të digjnin edhe objektin fetar, pasi thyen dyert dhe i vunë zjarr hyrjes së saj. Sulmi shkaktoi dëme materiale, por nuk u raportuan viktima.

Këto incidente vijnë në një kohë kur sulmet e kolonëve ndaj pronave palestineze, vendeve të kultit dhe tokave bujqësore janë shtuar në zonat përreth Ramallahut.

Në të njëjtën kohë, forcat izraelite zhvilluan bastisje në qytetin Silwad dhe fshatin Yabrud, në lindje të Ramallahut, duke dislokuar automjete ushtarake në rrugët kryesore. Sipas raportimeve, nuk janë kryer arrestime gjatë këtyre operacioneve.