Zelenskyy drejtuar Bjellorusisë: Hiqni pajisjet e sinjalizimit të përdorura nga Rusia, ose do ta bëjmë ne

Presidenti ukrainas Volodymyr Zelenskyy paralajmëroi Bjellorusinë fqinje, një aleat i ngushtë i Rusisë, të hiqte pajisjet e sinjalizimit të përdorura nga Kremlini për të synuar Ukrainën ose, tha ai, Kievi do ta bënte vetë punën.

“Çfarë kuptimi ka të thuash se ai lideri i fortë i Bjellorusisë, Aleksandr Lukashenko nuk dëshiron të jetë në luftë? Le ta heqë këtë pajisje, le ta fikë. Mendoj se një javë do të jetë e mjaftueshme që ai ta bëjë këtë”, tha Zelenskyy në një konferencë për shtyp në Kiev më 19 qershor.

“Nëse ai nuk e bën, ne do ta bëjmë”, tha ai, pa dhënë hollësi.

Zelenskyy tha se stacionet e transmetimit të sinjalit ndodheshin në dy rajone bjelloruse në kufirin me Ukrainën dhe përdoreshin nga forcat ruse për të ndihmuar në procesin e navigimit gjatë sulmeve ndaj civilëve ukrainas.

Raporti nuk mund të verifikohej në mënyrë të pavarur.

Zelenskyy foli gjithashtu për asetet e rafinimit të naftës në Bjellorusi, duke pretenduar se vendi ishte bërë një furnizues i madh për Rusinë dhe se Lukashenko mund t’i jepte fund kësaj.

“Sot ai është furnizuesi kryesor, ose një nga furnizuesit kryesorë, për ushtrinë ruse. Konkretisht, Lukashenko, konkretisht Bjellorusinë”, tha Zelenskyy.

“A mund të ndalet kjo? Jam i sigurt se është brenda fuqisë së tij. Dhe ai është personi që e kontrollon atë,” shtoi ai.

Kievi ka shtuar sulmet ndaj infrastrukturës dhe vendeve të magazinimit të naftës në Rusi, shpesh duke goditur thellë brenda vendit, përfshirë afër kryeqytetit, Moskës, duke krijuar mungesa në Rusi dhe duke rritur çmimet për civilët.

Nën udhëheqjen e Lukashenkos, Bjellorusia është aleati i ngushtë ushtarak i Rusisë dhe ka mbështetur luftën e Moskës kundër Ukrainës, duke ofruar mbështetje logjistike dhe duke përsëritur kërcënimet e Kremlinit ndaj NATO-s. Megjithatë, ajo nuk i është bashkuar Rusisë në pushtimin e saj në shkallë të plotë të nisur në shkurt 2022.

Bjellorusia, ashtu si Rusia, është përballur me sanksione të ashpra nga SHBA-ja dhe Perëndimi, megjithëse Lukashenko ka bërë përpjekje për të përmirësuar lidhjet me Uashingtonin, duke përfshirë lirimin e disa kundërshtarëve të burgosur dhe të burgosurve politikë, megjithëse shumë prej tyre mbeten pas hekurave në Bjellorusi.

Lukashenko ka mbajtur pushtetin që nga viti 1994. Ai e mbajti pushtetin në zgjedhjet presidenciale të vitit 2020, duke pretenduar fitoren pavarësisht pretendimeve të përhapura për mashtrim nga opozita bjelloruse dhe Perëndimi.