Dy bomba shpërthejnë në Pakistanin Veriperëndimor, mbeten 7 të vrarë

Të paktën shtatë persona u vranë dhe disa u plagosën në dy shpërthime të ndodhura buzë rrugës në Pakistanin veriperëndimor të shtunën, raportoi një zyrtar i policisë.

Incidenti ndodhi në distriktin Bannu të provincës veriperëndimore Khyber Pakhtunkhwa, e cila kufizohet me rajonin fisnor të trazuar të Vaziristanit Verior pranë Afganistanit.

Bombat u vendosën përgjatë një rruge. Shpërthimi i parë goditi një furgon pasagjerësh, duke vrarë pesë persona dhe duke plagosur tre të tjerë, u tha gazetarëve shefi i policisë së qarkut, Yasir Afridi.

Shpërthimi i dytë ndodhi ndërsa vendasit po transportonin trupat dhe të plagosurit në ambulanca. Të paktën dy persona u vranë në shpërthimin e dytë.