Vrasja e 45-vjeçarit në Shijak, ekzekutohet masa “arrest në burg” për dy kushërinjtë

Është ekzekutuar këtë të hënë masa e sigurisë “arrest në burg” për dy persona, kushërinj, të cilët akuzohen se në muajin janar 2026 janë autorë të vrasjes së 45-vjeçarit, Denis Çumani, në Shijak.

Sipas njoftimit të policisë, është ekzekutuar masa e sigurisë për shtetasit Indrit Ferra, 38 vjeç dhe Dorian Ferra 36 vjeç, të cilët ishin shpallur në kërkim nga policia pasi ishin konfliktuar dhe vrarë shtetasin Denis Çumani.

Ngjarja ka ndodhur më datë 27 janar, në shtëpinë e 45-vjeçarit, ku u qëllua me armë zjarri nga dy kushërinjtë Indrit dhe Dorian Ferra. Një vajzë dyshohet se ka qenë shkaku i përplasjes mes të rinjve, pasi viktima kishte ngacmuar me mesazhe vajzën që ishte në lidhje me Dorianin.

Pas zbulimit të ngacmimit të vajzës, dy kushërinjtë janë drejtuar drejt banesës së Denis Çumanit, ku e kanë dhunuar atë me grushte e shkelma dhe më pas e kanë qëlluar me armë. Pas kësaj, i plagosuri është dërguar fillimisht në Spitalin e Durrësit dhe më pas është transportuar me urgjencë drejt Spitalit të Traumës në Tiranë, por nuk ka mundur t’ju mbijetojë plagëve.

Njoftimi i policisë:

Specialistët e Seksionit për Hetimin e Krimeve të Rënda të Drejtorisë Vendore të Policisë Durrës ekzekutuan masën e sigurisë “Arrest në burg”, caktuar nga Gjykata e Shkallës së Parë e Juridiksionit të Përgjithshëm Durrës, për veprat penale “Vrasja me dashje”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe municionit”, për shtetasit:

-I. F., 38 vjeç dhe D. F., 36 vjeç (kushërinj), të dy banues në Shijak.  

Këta shtetas ishin shpallur në kërkim pasi nga hetimet dyshohet se më datë 27.01.2026, në qytetin e Shijakut, janë konfliktuar për motive të dobëta me shtetasin D. Ç., 45 vjeç dhe e kanë qëlluar me armë zjarri. Për shkak të dëmtimeve, 45-vjeçari ka humbur jetën pas disa ditësh, në spital.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.