Biologu zbulon një specie të re kërmilli deti, i vendos emrin Vozinha në nder të portierit të Kepit të Gjelbër

Biologu dhe tifozi spanjoll i futbollit, Jesus Ortea, i ka vënë një specie të re kërmilli deti emrin e Vozinha-s në nder të portierit të Kepit të Gjelbër i cili u bëri përshtypje tifozëve duke i zmbrapsur të gjitha përpjekjet e Spanjës në debutimin e vendit të tij në Kupën e Botës.

Ortea zbuloi kërmillin e vogël e të kuq të ndezur në Karaibe dhe e njoftoi zbulimin në kohën e Kupës së Botës.

“Ne zgjodhëm emrin Vozinha për nder të Vozinha-s i cili luajti një rol kryesor në paraqitjen e parë të vendit të tij në Kupën e Botës kundër “La Rojas””, tha Ortea në postimin e tij.

40-vjeçari Vozinha doli si një nga zbulimet e mëdha të turneut, duke e ndihmuar vendin e tij të kualifikohej për në raundin e 1/16-ave, ku ai spikati përsëri, pavarësisht humbjes në kohën shtesë ndaj kampiones së botës, Argjentinës.

Ortea, një profesor emeritus në Universitetin e Oviedos, ka kryer punë të gjerë kërkimore në ujërat detare përreth arkipelagut të Kepit të Gjelbër dhe në vitin 2023 u nderua nga vendi ishullor me Medaljen e Meritës.

Dashuria e biologut 75-vjeçar për futbollin është shprehur edhe në të kaluarën, teksa u ka vënë emra lojtarëve të futbollit dhe specieve të tjera detare, në nder të ish-portierit të Kosta Rikës dhe Real Madridit, Keylor Navas, si dhe Quini-t, sulmuesit të madh spanjoll të Sporting Gijon dhe ekipit kombëtar spanjoll gjatë viteve 1970 dhe 1980.